• 01.05.2025
• 2

ҚҰРМЕТТІ ОТАНДАСТАР!

1 мамыр - Қазақстан халқының бірлігі күні мерекесі құтты болсын! Бүгінгі күн - жүректердің үндестігін, ұлт пен ұлыстың татулығын, адам мен адамның арасындағы шынайы сенім мен сыйластықты дәріптейтін ерекше күн.

Бірлік – сырттай жай сөз сияқты көрінгенімен, оның артында терең мән, үлкен жауапкершілік, һәм тұтас тарих жатыр. Бірлік дегеніміз – бір дастарқанда нан бөлісу ғана емес, бір мүдде, ортақ мақсат, ортақ болашақ үшін еңбек ету. Бұл – сенің ұлтың, дінің, тілің қандай болса да, бір елдің азаматы ретінде өзіңді осы жердің бөлшегі сезіну. Бұл – бір-бірімізге деген сенімді жоғалтпай, қиын сәтте қолдау көрсету. Бұл – бейбіт өмірдің қадірін түсініп, әр күнге шүкіршілік ету.

Қазақстан – сан түрлі этностың алтын бесігі. Әр ұлт өз ділімен, өз дінімен, өз мәдениетімен осы топырақта тамыр жайып отыр. Бірақ осының бәрін біріктіріп тұрған бір ғана күш бар – ол біздің ортақ жүрегіміздегі тыныштыққа, татулыққа, сыйластыққа деген ұмтылыс. Осы ұмтылыс – нағыз отаншылдықтың көрінісі.

Бүгінгі күн – бізді бөлетін емес, біріктіретін сәт. Әрқайсымыздың жан дүниемізде мейірім мен түсіністік болса – ел болып көгереміз, өсеміз. Бірлік бар жерде – береке бар. Татулық бар жерде – тұрақтылық бар. Ал тұрақтылық – өсіп-өркендеудің ең берік негізі.

Осы күнде жүректеріңіз мейірімге толы болсын. Бірлігіміз бекем, еліміз аман, болашағымыз нұрлы болғай!

“ORDA” жоғары колледжі